برحية شواطي/ بقلم الشاعر الكبير ابو وصفي المرعي

# برحية شواطي #

البصره شربة مای تطلب مالگت
والنوارس عافت الشط ومشت
للاسف بیها نفط بس للچلاب
والطیور بمای شطها اتسممت
البصره تنطی ومحد ایگللها هاچ
دسمه زبدته ومعدهم ودچت
البصره عید  بیوتهم لیل ونهار
وظلمه هندس لیلهه وماعیدت
البصره غسلت عارهم یوم النزال
وقدمت قربانهه  وماقصرت
البصره ثوب العافیه لكل العراق
ثوبها الاخضر نسته وشیبت
البصره برحية شواطي وبت دلال
مات شاطيهه وعلى الشاطي انتچت
اكحيله حلوه اشگد یحبنهه البنات
شافت الحنه یبیس ویبست
البصره مابیهه مضایف مستحیل
البصره ذبحت كل اهلهه وعزبت
بابها الگرنه وبعد مابیها باب
وفاوها الكوسر وموگدها البخت
البصره دلتها الهله وگهوتهه شوگ
البصره هلهولة عرسنه وبغگت
البصره شالت ضیمهه وحمل الثجيل
ومحد الحس بحملهه وحندبت
البصره شفة عاشگ ویبست حنین
والمطر مامر علیهه وفطرت
البصره من شافت اهلهه مسدحین
تبچی من اول گبل مابطلت
البصره راحت تشتكي لدجله وفرات
گلتلهم عن عطشهه وما اجت
عیونهه العطشانه عامیهه التراب
شهگه شهگت روحهه وماسولفت
الله يرحمها النطت للناس خير
والله لا يرحم الناس الما وفت
هاي تاليت الوكت اوف امداه
البصره يكتلها العطش غم الوكت
تاكل البايت واهلهه امفرفحين !!
والحراميه لحم منهه كلت !!
البصره تامر امر لو عدكم ضمير
لو مثل نسوانكم چا صيحت
ياادب سزيه يذيول الغريب
لو حچینه اویم (ال---) استحت -

* ابو وصفي المرعي *