توابيت و حشف/ بقلم الشاعر القدير ابو وصفي المرعي

* توابيت وحشف *

لو ماحچي الناس چا عنك مشيت
واترك إملاگاك هيج اعله الصدف

وأرسم الخطوه چذب فوگ الطریق
وچني شايل گلب قاسی وما رجف

وچني ماشي وعايفك يا بو الخصيب
بيك ماظل للدوه إتميره وسعف

اشعندي باقي وثوبك الغطاني مات
والنده الغطه الورد من فگري جف

وامشي ليل وحلمك الغافي وراي
حته ارسمك بيت طاح وشط نشف

شوفتني الحنطه وابچفك دمار
وچفي فارغ ماشفتلی إنمدلي چف

ماي لگاحك شرب منه الغريب
واحنه ماي عيونه ابطرواك شف

يلی حالك حال سچه اتحب قطار
يل قطارك من على السچه انحرف

ارد اعوفك يالخذتك مني حوت
اشلون تقبل كون اعيش اعله النتف

صگور ناسك والصگر ياكل جديد
هم شفت شاهين ياكل بالجیف ؟

چنت طیب بس ذنب ناسك چبیر
بدلوا برحي بتوابيت  وحشف

خل اعوفك يالعفتني ومادريت
حتى حچیك هم تغير واختلف

چنت مثل النای عزفك بي حنين
صار كومه سنين نايك ماعزف

للاسف صاير طبل بيد الزغار
وياطفل يسكت اذا لازمله دف

بطلت ماگول احبك واشتريك
وانت بايعني برخص ياللاسف

كلشي بيك انباك بس اسمك نسوه
چان هم انباگ بس ربك لطف

ظل غريب وآنه خل امشي غريب
يلي بسمك صاح كل عمري وهتف

جاك ملك الموت واول مااجاك
مر على عيوني عماهن حفني حف

مااردلك وامشي وحدي وما اجيك
جرحي إنت وضمديته ورد نزف -

* ابو وصفي المرعي *