خيال الماي/ بقلم الشاعر القدير ابو وصفي المرعي

* خيال الماي *

امشي وبيدي شمعه متيه الراي
اثاريهه الظهر بس آنه ماادري
طگ گلبي العمه وعيوني مفتوحات
گلبي المايوچد لیلی من ظهري
طبخت العافيه وغمست بيهه عيون
كلوا كل الطبخته وتفلوا ابجدري
وامد چفی اعله جرحي
وما لگیت اچفوف
جرحي المد إدينه وصفگ یادهري
امان انگول واحنه الباگنه الناطور 
وافراشي الفرشته انباگ من حدري

مبیوگ الورد واللیل والچرداق
لا ظلت سفینه ولا نهر یجري
ساكت ماحچیت ولا گلت مبیوگ
رد نفس الحرامي وباگ كل فكري
سرت بينه الليالي اويالنجوم نجوم
اثارينه بخيال الماي # مانسري

وعبرنه هذيچ وهای گلنه تهون
لمن ماكلانه الدود واليدري (الجدري )
رحنه انفزع الشاطي اعله گطرة ماي
رحنه ولن نهرنه ایصیح يانهري
عمري المات # مامات النهر والماي
ماعاش النهر لو ماشرب عمري
ماگولن گبل عوف الگبل والچان
من اذكر شبابك ينكسر ظهري
عوفك من امس من چان حظنك فيض
وسولفلي اعله باچر لو طفح صبري
گوت اللا یموت انطینه خل انعیش
ولاتطري المضى والراح # لاتطري

وضم بشفاف صبرك گطره للحبوك
وينك مو كتلهم.  مايك البحري
شفاف الگاع ذبلت والگصب والهور
گطر للشفایف ###  یبست بقهري
سراب انشوف مايك نركض مغمضين
ونرجع من نشوف امطوف الحمري
ابنادم من يموت ايغسلونه بماي
وعدنه الماي مات اشلون # ماندري

*ابو وصفي المرعي *