وطن عطشان/ بقلم الشاعر القدير ابو وصفي المرعي

###وطن عطشان ###

مو قصة عطش --مو وكت عده وفات
ولا قصة نهر-------- يبست لهاته ومات
الموضوع اكبر ----------من قضية ماي
واكبر من وطن ------ مبيوع بالسنتات
قصتنه ابتسامه --------وباگها الناطور
وشيطان وگعد----- ببیوت اهلنه وبات
ما یگدر عدونه------ ایدمر النه البیت
دمرناه بدینه ------- وضحكت الشمات
يااول وطن ----------مبيوع تالي الليل
وانباع ابرخص --------عش الحمامات
مالوم النهر ---------لو شح علیه الماي
نگطات الگصص ------عازاتهن عازات
الخیر من تجیله ---ایبیع حتی الروح
ویفهم بالاشاره ------وتنلغي الچلمات
وین الگه البعد ---مابي دغش وانخاه
اوين الگه الشریف---- الخير المامات
یبو سوالف حزینه--- اتدوخ من اتنود
ارفع راس بختك------- باوع النجمات
يبو سومر شجاك ------ويبست بهداي
يبو آشور -------ليش اتگیض ابمشتاك
بشليلك شلت حته اللي عافه الموت
ومن لگمت جهالك------- وكلتهم ذات
يبو گلب الچبیر ----اطفالك ايموتون
وشجرات البقن ذني اهنه محسوبات
يمته اتگول كافي اوبيك ابو الحسنين
ماهزك نداء الصاحلك------- هيهات؟
قصتنه طويله --الظاهر احنه انموت
ولا يظهر عدل--- وانشوفلك عدلات-

وطن عطشان
                   (ابو وصفي المرعي)